Fréttabréf BREIÐFIRÐINGAFÉLAGSINS 3. tbl. apríl. 2014 20. árg. er komið út.

Fréttabréf    

BREIÐFIRÐINGAFÉLAGSINS 

Faxafen 14. 108 Reykjavík S: 581-4511 

3. tbl. apr. 2014 20. árgangur 

Ábyrgðarmaður Snæbjörn Kristjánsson

Kæru félagsmenn
Senn er veturinn á enda sem hefur verið mjög góður hvað félagsstarfið varðar. Þá vil ég þakka það mikla traust sem mér er sýnt með því að kjósa mig aftur sem formann. Breyting varð á stjórn félagsins, þar sem Sæunn G. Thorarensen, Júlíana Ósk Guðmundsdóttir og Alvilda Þóra Elísdóttir gáfu ekki kost á sér. Ég vil fyrir hönd félagsins þakka þeim fyrir vel unnin störf. Stjórn félagsins er nú skipuð eftirtöldum félagsmönnum:
Sigurður Eyjólfsson varaformaður, Hörður Rúnar Einarsson, gjaldkeri, Bjarni Kristjánsson, varagjaldkeri, Jófríður Benediktsdóttir, ritari, Finnbjörn Gíslason, vararitari og Hulda Karlsdóttir, meðstjórnandi. Í varastjórn eru, Kristjón Sigurðsson, Þorsteinn Kristjánsson og Sigrún Eyjólfsdóttir. Prjónakaffið gekk mjög vel undir styrkri stjórn Erlu og Sæunnar. Ýmsar kynningar og sýningar hafa verið á prjónakvöldunum. Félagsvistinni er lokið og var aðsóknin góð, spilað á 18-22 borðum. Alls komu 227 að spila hjá okkur í vetur. Spilað var alla sunnudaga frá áramótum til 13. apríl. Mikil ánægja hefur verið með kaffið og meðlætið á spiladögunum, en það er að mestu heimatilbúið. Ég vil þakka fyrir þá miklu vinnu sem lögð hefur verið í þetta. Bridge-deildin hefur gengið vel og hefur verið spilað öll sunnudagskvöld. Góð mæting var á páskabingóið og fóru margir heim með páskaegg.Spurningakeppni átthagafélaganna lauk 4. apríl með sigri Skaftfellingafélagsins. Í öðru sæti var Húnvetningafélagið og Breiðfirðingafélagið í þriðja sæti. Aðsókn að spurningakeppninni var mjög léleg en þó best frá okkar félagi. Átthagafélögin þurftu að greiða 8.350,- kr. til að fá fyrir útlögðum kostnaði. Ekki hefur verið ákveðið um framhald keppninnar en þó var ákveðið að halda fund í september til að taka stöðuna.
Það sem eftir er af dagskrá félagsins er dagur aldraðra þann 4. maí og verður hann með hefðbundnu sniði, síðan er gróðursetningarferðin í Heiðmörkina þann 3. júní.
Sumarferðin verður síðan helgina 27.-29. júní að Árbliki og verður ferðin auglýst í næsta fréttabréfi.
Kær kveðja
Snæbjörn Kristjánsson, formaður

Bridge verður spilað eftirtalda daga í Breiðfirðingabúð kl. 19:00
Æfingagjaldið er kr. 800.- pr. kvöld og er kaffi innifalið í verðinu.
4. Maí Tvímenningur keppni 2 af 3
11. Maí Aðalfundur/tvímenningur

Helstu atriði dagskrár fram að sumarfríi:
4. maí. Dagur aldraðra, kl 14:30
3. júní. Gróðursetningarferð í Heiðmörk.
27. til 29. júní. Sumarferð félagsins.

Skráning nýrra félaga
Ef þið þekkið einhvern sem vill ganga í Breiðfirðingafélagið, þá er hægt að senda inngöngubeiðni á netinu www.bf.is “Hafa samband”

Dagur aldraðra, 4. maí, kl 14:30

Breiðfirðingakórinn syngur nokkur lög, kaffi og kökur.

Allir velkomnir

Vortónleikar Breiðfirðingakórsins

Vortónleikarnir verða að þessu sinni að kvöldi fimmtudagsins 8. maí í Langholtskirkju og hefjast kl. 20:00

sem er breyttur tími frá fyrri árum. 

Sjá nánar á heimasíðu félagsins www.bf.is

Breiðfirðingakórinn 

Ásamt kór eldri borgara í Dalabyggð 

verður með tónleika í Dalabúð

 10. maí kl. 14:00

Frítt inn - Allir velkomnir

Sumarkveðjur frá Breiðfirðingakórnum 

Nú  hefur vetur konungur kvatt okkur enn eitt árið og vorið með allri sinni dýrð farið að láta ljós sitt skína.  Vorið er yfirleitt annasamur tími hjá kórnum og er þetta árið engin undantekning þar á.   Framundan er skemmtilegur tími við tónleikahald og ferðalag enda skal nú sýnt hvað við höfum verið að æfa  í vetur.  Dagskráin inniheldur bæði gömul og ný lög sem minna okkur á fegurðina og gleðina sem fylgir íslensku sumri og fyllir okkur  stolti yfir að vera íslendingar.  Vortónleikarnir  verða að þessu sinni að kvöldi fimmtudagsins 8. maí í Langholtskirkju og hefjast kl. 20:00 sem er breyttur tími frá fyrri árum.    Létt á lóuvængjum líður hugurinn, yfir höf og heiðar heim í dalinn minn,  þetta höfum við sungið oft í vetur enda munum við heimsækja dalinn okkar þetta vorið.  Þann 10 maí er stefnan tekin vestur í dali þar sem við verðum með tónleika í Dalabúð kl. 14:00 og er ánægjulegt að segja frá því að með okkur verður kórinn, Glaðar raddir, sem er kór eldri borgara í Dalabyggð.  Já, söngurinn gleður svo sannarlega og kætir, bæði söngvara og hlustendur.  Já og með söng munum við gleðja þá sem byggt hafa upp landið og rutt þannig leiðina fyrir okkur sem yngri erum á degi aldraðra í Breiðfirðingabúð þann 4. maí en þannig hefur kórinn ekki aðeins glatt eldri breiðfirðinga og fjölskyldur þeirra heldur einnig þakkað félaginu fyrir þann góða stuðning sem það veitir kórnum. 

Það er alltaf gaman að hefja vetrarstarfið að hausti en það er ekki síður gaman að sjá vinnu vetrarins blómstra að vori. þá má sjá bros á hverju andliti þegar haldið er á vit ævintýranna sem sumarið hefur upp á að bjóða.  Ég óska ykkur öllum gleðilegs sumars og þakka fyrir ánægjulegt vetrarstarf. 

Halldóra K. Guðjónsdóttir, formaður  Breiðfirðingakórsins.