Fréttabréf

BREIÐFIRÐINGAFÉLAGSINS

Faxafen 14. 108 Reykjavík S: 581-4511

6. tbl. nóv. 2012 18. árgangur

Ábyrgðarmaður Snæbjörn Kristjánsson

Kæru félagsmenn

Þá er vetur konungur farinn að sína sig, en það breytir því ekki að  mikið líf er í dagskrá félagsins. Aðsókn að félagsvistinni hefur verið mjög góð og hefur verið spilað á allt að 20 borðum. Alltaf eru að birtast ný andlit við spilaborðin, bæði ungir sem aldnir og ekki má gleyma þeim sem sjaldan láta sig vanta. Bridge hófst 16. september og er spilað á 8– 10 borðum. Prjónakaffið hefur verið mjög líflegt í haust og er það orðinn fastur liður í dagskránni. Vetrarfagnaðurinn var haldin fyrsta vetrardag 27. október, að þessu sinni var gerð tilraun með að bjóða upp á kjötsúpu fyrir dansleikinn, en ekki var næg þátttaka til að úr því yrði. Aðsóknin að dansleiknum var lítil, þannig að trúlega verður þessi uppákoma lögð af. Hagyrðingakvöldið verður  fimmtudaginn 15. nóvember kl. 20:00, sú nýbreytni verður að öllum gefst kostur á að botna fyrriparta, sem hægt er að nálgast á heimasíðu félagsins og skila þegar komið er á hagyrðingakvöldið. Síðan verður ganga  laugardaginn 17. nóvember og verður gengið frá Breiðfirðingabúð og er mæting kl. 13. Að göngu lokinni verður boðið upp á kaffi og vöfflur.

Kórinn tók þátt í veglegu kóramóti sjö átthagakóra sem haldið var í Háskólabíói þann 14. október. Kóramótið tókst mjög vel og vonandi verður þetta árlegur viðburður. Æfingar hjá kórnum ganga vel, og er þegar byrjað að æfa jólalögin. Kórinn heldur sína árlegu jólatónleika í Fella- og Hólakirkju sunnudaginn 16. desember.

Aðventudagur fjölskyldunnar verður haldinn 2. desember, fyrsta sunnudag í desember.

Jólaballið verður síðan 29. desember. Sjáumst hress.

Kær kveðja

Snæbjörn Kristjánsson, formaður

Félagsvist verður spiluð eftirtalda sunnudaga:

                11. nóv.           2. dagur í fjögurra daga keppni

            18. nóv.           3. dagur í fjögurra daga keppni

            25. nóv.           4. dagur í fjögurra daga keppni

Spilin hefjast alla dagana stundvíslega kl. 14:00

Fyrstu verðlaun kvenna og karla verða kr. 4.000,- og önnur verðlaun kr. 2.500,- auk þess fær sá sem oftast situr við sama borð svolitlar sárabætur.

Í fjögurra daga keppni eru spilaðir fjórir dagar, en þrír bestu gilda við útreikning stiga. Veitt eru heildarverðlaun að verðmæti kr. 10.000,- fyrir fyrsta sætið og kr. 5.000 fyrir annað sætið.

Sá sem verður hæstur eftir veturinn í heild mun fá sérstakan glaðning, eins konar heiðursverðlaun í vor.

Góðar kaffiveitingar eru eftir spilin. Miðaverð er kr. 1000,-.

Bridge:

Við Breiðfirðingar og fleiri ætlum að spila á sunnudögum í vetur eins og áður. Fyrsta spilakvöldið er 16. september kl. 19.00 í Breiðfirðingabúð. Ekki þarf að skrá sig heldur einungis að mæta þegar ykkur langar til. Við ætlum að vera mjög umburðalynd og því er tækifæri fyrir þá sem óvanir eru að spila bridge að koma og æfa sig.

Æfingagjaldið er kr. 700.- pr. kvöld og er kaffi innifalið í verðinu.

Prjónakaffi í Breiðfirðingabúð

Síðasta prjónakaffið fyrir áramót verður mánudaginn 19. nóv.  kl. 20:00. Upplýsingar gefa Erla í síma 898-6747 og Sæunn í síma 864-2201.

Takið með ykkur handavinnuna og/eða sjáið hvað verið er að gera. Kaffi og gos verður til sölu.

15. nóv. Hagyrðingakvöld kl. 20:00

Hagyrðingakvöldið verður undir stjórn Kristjáns Jóhanns Jónssonar. Hagyrðingar eru: Ragnar Ingi Aðalsteinsson, Hermann Jóhannesson, Jóhanna Fríða Dalkvist, Halla Gunnarsdóttir, Kristján Runólfsson og Jón Kristjánsson.

Fyrripartar handa sal og hagyrðingum  eru birtir á heimasíðu félagsins www.bf.is

Miðaverð er kr. 1000.- (kaffi og meðlæti innifalið í verði).

17. nóv. Gönguferð frá Breiðfirðingabúð kl. 13:00

Mæting í gönguferðina er við Breiðfirðingabúð og verður lagt af stað kl.13:00. Gengið verður um nágrennið. Boðið verður upp á kaffi og vöfflur að göngu lokinni.

Aðventudagur:

  2. des. Aðventudagur fjölskyldunnar hefst kl. 14:30.

Jólaball:

29. des. Jólatrésskemmtun fyrir alla fjölskylduna kl. 14:30.

Helstu atriði dagskrár eftir áramót:

26. jan.     Árshátíð á Þorra. Takið kvöldið frá strax.

  2. mars.  Dansleikur og skemmtun Breiðfirðingakórsins

16. mars.  Páskabingó, kl 14:30

13. apríl.  Vorfagnaður frá kl. 22:00 til 02:00

  5. maí.    Dagur aldraðra, kl 14:30

  4. júní.    Gróðursetningarferð í Heiðmörk.

21. til 23. júní.  Sumarferð félagsins.

Fréttabréfið í tölvupósti

Stöðugt fjölgar þeim sem fá fréttabréfið sent í tölvupósti og er það töluverður sparnaður fyrir félagið, því póstburðargjöld, pappír og ljósritunarkostnaður fer stöðugt hækkandi.

Til að fá fréttabréfið sent í tölvupósti er þægilegast að senda tölvupóst á This email address is being protected from spambots. You need JavaScript enabled to view it. þar sem  nafn og heimilisfang kemur fram.

Frá Kórnum

Breiðfirðingakórinn byrjaði vetrarstarfið af  miklum krafti undir stjórn  Judithar Þorbergsson  og er ljóst að veturinn lofar góðu.  Tók hann þátt í kóramóti   14. október ásamt 6 öðrum átthagakórum af Reykjavíkursvæðinu.   Breiðfirðingakórinn var fyrstur á svið og gaf þannig tóninn fyrir  glæsilega og vel heppnaða tónleika.  Í lokin sungu allir kórarnir saman 2 lög og má segja að krafturinn og gleðin frá öllu þessu söngglaða fólki hafi fyllt Háskólabíó.   Það er ljóst að þarna var hin besta skemmtun,  ekki  bara fyrir tónleikagestina  heldur líka fyrir okkur kórfélagana.  Nú er bara að halda þessu samstarfi  áfram og gera þetta að föstum viðburði í tónleikahaldi á Íslandi.

17. nóvember næstkomandi mun kórinn  standa fyrir bjórkvöldi í Breiðfirðingabúð og er ætlunin að fá annan kór til að vera með okkur.  Meiningin er að kórarnir syngi nokkur lög hvor í sínu lagi og síðan  2 lög saman.  Loks tekur við dans og önnur skemmtun fram á nótt og eru allir velkomnir.  Bjórkvöldið var í fyrsta skipti haldið í fyrra og var hin mesta skemmtun. Hvetjum við alla sem þetta lesa að drífa sig og taka með sér gesti.

Við erum  komin í jólaskap og farin að æfa jólalögin af miklum móð. Kórinn mun  syngja nokkur lög á hinum árlega aðventudegi fjölskyldunnar hjá Breiðfirðingafélaginu. Sú hátíð hefur verið sérstaklega vel sótt og er rómuð fyrir góðar veitingar og hátíðlegan og glaðlegan söng.  Árinu ljúkum við síðan með okkar skemmtilegu  jólatónleikum sem verða í Fella og Hólakirkju 16. desember kl.20:00  þar sem sungin verða bæði gömul og ný jólalög. Það er gott á lokasprettinum fyrir jól að loka á amstrið eina kvöldstund og gleyma sér við hátíðlegan söng.

Hvet ég fólk til að fjölmenna á sem flesta viðburði kórsins því fátt er meira gefandi en að hlusta á góða tónlist í góðara vina hópi.

Hlakka til að sjá ykkur sem flest.

F.h. Breiðfirðingakórsins

Halldóra K. Guðjónsdóttir, formaður.