Vísnakvöld þriðjudaginn 6. des. 2011

Vísnakvöld verður haldið í Breiðfirðingabúð þriðjudaginn 6. desember.

Samkoman hefst kl. 20:00 (húsið verður opnað kl. 19:30)

 Dagskráin verður í aðalatriðum sem hér segir:

Þórarinn Eldjárn rifjar upp kveðskap eftir föður sinn, Kristján Eldjárn, fyrrum forseta Íslands.

Rósa Þorsteinsdóttir talar um rímnalög og flytur nokkur dæmi.

Anna Þorbjörg Ingólfsdóttir kynnir væntanlega útgáfu á verkum skáldkonunnar Erlu og les nokkur valin kvæði.

Davíð Ingi Ragnarsson syngur einsöng. Undirleikari er Katalin Lörincz.

Sitthvað fleira verður til skemmtunar sem kynnt verður síðar.

Eins og áður verður ort á staðnum. Sett verða fram yrkisefni og viðstaddir fá tækifæri til að sýna kunnáttu sína í vísnagerð. Þetta verða bæði fyrripartar til að botna og efni til að gera skil í heilli vísu. Vísurnar verða metnar af dómnefnd áður en kvöldið er liðið.

Iðnú bókaútgáfa/ferðakort veitir vegleg bókaverðlaun.

Inn á milli atriða verður farið með vísur og sagðar sögur. Gestum verður gefinn kostur á að tjá sig í pontunni ef þeir luma á góðri vísu eða stuttu skemmtilegu kvæði.

Þeir sem mæta á vísnakvöldið mega spreyta sig á að gera botna við þessa fyrriparta:

A:  Út um grundir andans fer ég,

      á þar stund með ljóðadís.

B:   Menguð hatri, byggð af bjánum

      byltist jörðin margan hring.

eða að yrkja vísu, eða stutt kvæði, um eftirtalin efni, annað eða bæði:

C:  Fiskveiðistjórnunarkerfið.

D:  Hver er uppáhaldsmaturinn þinn?

Úrlausnum skal skila við innganginn þegar mætt er á staðinn. Fyrir þetta verða veitt sérstök verðlaun.

Með bestu kveðjum

Ragnar Ingi

Aðgangseyrir er kr. 500 og er kaffi innifalið.